Përfaqësues të Ministrisë së Zhvillimit Rajonal (MZHR-së) dhe Institutit Kosovar për Qeverisje Lokale (KLGI), sot me datë 28 maj 2020, mbajtën takimin virtual për diskutimin e Draft – Analizës së përgatitur nga MZHR lidhur me investimet kapitale të realizuara sipas rajoneve zhvillimore në vitin 2019.

Me këtë rast, palët diskutuan për përmbajtjen e dokumentit dhe pasqyrimin e investimeve kapitale të realizuara nga Ministritë e linjës në rajonet zhvillimore, investimet kapitale të realizuara nga vet komunat, sektorët ku është investuar më së shumti dhe më së paku, si dhe rezultatet e dala sipas pesë (5) rajoneve zhvillimore në Kosovë: Qendër, Lindje, Jug, Veri dhe Perëndim. Me qëllim të monitorimit dhe promovimit të zhvillimit socio – ekonomik rajonal të balancuar dhe marrë parasysh mandatin e saj ligjor për përgatitjen e analizave në këtë fushë, në konsultim me Ministritë e linjës, komunat dhe AZHR-të, MZHR do të publikojë edhe këtë vit Analizën e investimeve kapitale të realizuara sipas rajoneve zhvillimore në Kosovë për vitin 2019.

Në pamundësi të organizimit të takimeve dhe punëtorive në hapësira pune për shkak të masave kundër pandemisë COVID 19, palët diskutuan edhe lidhur me takimin virtual të organizuar për nesër me datë 29.05.2020, në të cilin do të marrin pjesë: drejtorë për zhvillim ekonomik të gjitha komunave të Republikës së Kosovës dhe përfaqësues të agjencioneve zhvillimore rajonale (AZHR-ve).

MZHR dhe Instituti KLGI, u dakorduan të organizojnë edhe takime tjera konsultative me Ministri të linjës dhe komunat, lidhur me shqyrtimin dhe diskutimin edhe të aktiviteteve tjera të parapara nga MZHR për realizim në vitin 2020.