Më datë 08 shtator 2025, në Ministrinë e Zhvillimit Rajonal u mbajt takimi i dytë i Grupit Punues për hartimin e dokumentit për Qasje në Fondet e BE-së. Në këtë takim u shqyrtua drafti i konsoliduar i dokumentit, i cili synon të përcaktojë mekanizmat dhe procedurat që do të mundësojnë qasje më të lehtë, transparente dhe efikase në fondet që ofron Bashkimi Evropian për Kosovën. Ky proces përbën një hap të rëndësishëm për forcimin e kapaciteteve të stafit të MZHR-së në shfrytëzimin e këtyre mundësive për zhvillim rajonal.

Dokumenti parasheh udhëzime praktike dhe sqarime lidhur me fondet më relevante të BE-së për zhvillim të balancuar rajonal dhe territorial, përfshirë Fondin Evropian për Zhvillim Rajonal (ERDF), Fondin e Kohezionit (CF), Fondin Social Evropian Plus (ESF+), Fondin për Kalimin e Drejtë (JTF), programin REACT-EU si dhe Instrumentin e Para-Anëtarësimit (IPA III). Takimin e kryesoi z. Arbnor Sadiku, zv. Drejtor i DIEKP-së dhe morën pjesë: znj. Kreshnike Arifi, z. Xhevat Sefaj, z. Kreshnik Uka, z. Memli Gashi dhe z. Ylber Salihu.