Sot, më datë 27.11.2025, Ministria e Zhvillimit Rajonal mori pjesë në tryezën e organizuar nga AZHR Perëndim, me fokus në diskutimin e procesit të themelimit dhe funksionalizimit të Qendrave të Zhvillimit Rajonal për rajonet Perëndim dhe Jugperëndim.

Takimi u hap nga z. Sokol Luta, Drejtor i AZHR Perëndim, i cili prezantoi qëllimin e organizimit të kësaj tryeze, duke vënë theksin në shqyrtimin e hapave konkretë institucionalë dhe operacionalë për krijimin e këtyre qendrave. Këto qendra do të shërbejnë si mekanizma mbështetës për komunat në planifikimin e zhvillimit rajonal, koordinimin ndërkomunal, forcimin e kapaciteteve profesionale dhe rritjen e përthithjes së fondeve zhvillimore.

Më pas, Dr. Refike Sülçevsi, U.D. Sekretare e Përgjithshme e MZHR-së, theksoi rëndësinë e organizimit të kësaj tryeze, duke vlerësuar se ky takim ka një rëndësi të veçantë për konsolidimin e sistemit të zhvillimit rajonal të balancuar në Republikën e Kosovës, si dhe është në përputhje të plotë me obligimet institucionale që dalin nga Ligji nr. 08/L-190 për Zhvillim Rajonal të Balancuar, i cili përcakton bazat ligjore të funksionimit të politikave rajonale, forcimit të bashkëpunimit ndërkomunal dhe zhvillimit socio-ekonomik të ekuilibruar ndërmjet rajoneve të vendit.

Takimi vazhdoi me fjalë rasti nga Kryetari i Komunës së Pejës, z. Gazmend Muhaxheri, dhe Kryetari i Komunës së Klinës, z. Zenun Elezaj, të cilët shprehën mbështetje për këtë proces dhe gatishmërinë e tyre për bashkëpunim në zhvillimin e strukturave rajonale.

Në këtë tryezë, nga Ministria e Zhvillimit Rajonal morën pjesë: z. Ylber Çitaku, Drejtor i DPKZH, znj. Kreshnike Arifi, Udhëheqëse e Divizionit për Koordinim të Zhvillimit Rajonal, si dhe përfaqësues të tjerë nga komunat e Rajonit Perëndim.

Ministria e Zhvillimit Rajonal mbetet e përkushtuar në avancimin e politikave të zhvillimit rajonal dhe në forcimin e bashkëpunimit me agjencitë rajonale dhe komunat, në funksion të zhvillimit të balancuar socio-ekonomik në të gjitha rajonet e vendit.