Në kuadër të “Ditëve të Biznesit të Vogël 2019”, me datë 20.11.2019 u mbajt konferenca me bizneset e rajonit të Ferizajt, e organizuar nga Ministria e Tregtisë dhe Industrisë, përkatësisht Agjencia për Investime dhe Përkrahjen e Ndërmarrjeve në Kosovë (KIESA), në bashkëpunim me Komunën e Ferizaj.

Në konferencë të pranishëm ishin përfaqësues nga institucionet qendrore dhe lokale, ATK, Dogana, KEDS si dhe përfaqësues të komunitetit të biznesit të kësaj ane.

Përfaqësuesi nga Ministria e Zhvillimit Rajonal(MZHR) z. Besim Kamberaj, prezantoj programet e zhvillimit rajonal, të cilat janë me interes për bizneset ku theksoi se Ministria e Zhvillimit Rajonal do të vazhdojë të mbështetë bizneset edhe në vitet e ardhshme me qëllim të rritjes së punësimit dhe avancimin e bizneseve.

Aktivitetet në kuadër të “Ditëve të Biznesit të Vogël 2019” kanë për qëllim të zhvillojnë dialogun publiko - privat i cili, së bashku me fuqizimin e ndërmarrësisë, është më se i domosdoshëm për një zhvillim të qëndrueshëm të sektorit privat, respektivisht zhvillimit ekonomik.