MINISTRIA E ZHVILLIMIT RAJONAL (MZHR)
 

RREGULLORE (QRK) NR.02/2021 PËR FUSHAT E PËRGJEGJËSISË ADMINISTRATIVE TË ZYRËS SË KRYEMINISTRIT DHE MINISTRIVE 
SHTOJCA NR.15 

MANDATI I MINISTRISË SË ZHVILLIMIT RAJONAL 

Ministria e Zhvillimit Rajonal (në tekstin e mëtejmë: MZHR) ka përgjegjësitë si në vijim: 

1.Përgatitjen e politikave publike, hartimin e akteve ligjore, miratimin e akteve nënligjore dhe përcaktimin e standardeve të detyrueshme në fushën e zhvillimit rajonal dhe zbatimin e tyre; 

2.Në bashkëpunim me ministrinë përkatëse për punë të jashtme dhe diasporë dhe me ministritë e përkatëse, zhvillon dhe merr pjesë në nismat dhe programet rajonale sa i përket fushës së zhvillimit rajonal; 

3.Planifikon dhe zhvillon treguesit për monitorimin e zhvillimit socio-ekonomik rajonal të balancuar; Koordinon aktivitetet me institucione të nivelit qendror dhe lokal si dhe akterë tjerë relevant në përkrahje të zhvillimit socioekonomik rajonal të balancuar dhe regjenerimit të vendeve të reja të punës;

4.Në bashkëpunim me institucionin përgjegjës për integrim evropian dhe ministrinë përkatëse për financa, dhe në përputhje me kornizën ligjore në fuqi merr pjesë në administrimin e ndihmës së huaj financiare në fushën e zhvillimit rajonal; 

5.Zhvillon dhe menaxhon programe për të ofruar zhvillim socio-ekonomik rajonal të balancuar në gjithë territorin e Republikës së Kosovës, si dhe bën promovimin e tyre; 

6.Bashkërendohet me ministrinë përgjegjëse për tregti dhe industri dhe institucionet e tjera për zhvillimin e zonave ekonomike me qëllim të zhvillimit socioekonomik rajonal të balancuar; 

7.Në bashkërendim me ministrinë përgjegjëse për tregti dhe industri harton dhe zhvillon kriteret për identifikimin dhe promovimin e brendeve rajonale; 

8.Përgatit analiza lidhur me zhvillimin socio-ekonomik rajonal të balancuar;

9.Harton raporte vjetore për Qeverinë lidhur me programet dhe iniciativat e zhvillimit rajonal; 

10.Kryen edhe detyra të tjera, që i caktohen ministrisë me legjislacionin përkatës në fuqi; 

11.Fusha e përgjegjësisë administrative të kësaj ministrie përfshin zhvillimin socioekonomik rajonal të balancuar në pajtim me kushtetutën dhe legjislacionin në fuqi dhe në asnjë rrethanë nuk nënkupton ndonjë organizim të ri administrativ apo territorial.