Në përfundim të reazimit të Planit të vizitave në komuna, përfaqësues të Ministrisë së Zhvillimit Rajonal vizituan edhe dy komunat e Rajonit Zhvillimor Veri: Komunën e Mitrovicës dhe Komunën e Skënderajt.

Përfaqësuesit e MZHR-së, u pritën nga përfaqësuesit e dy komunave, konkretisht përfaqësuesit e drejtorive për zhvillim ekonomik dhe të asaj për kulturë rini dhe sport. Temat e diskutimit ishin: nxitja e komunikimit të komunave brenda rajoneve zhvillimore me qëllim të identifikimit të ideve dhe projekteve të përbashkëta me impakt ekonomik rajonal dhe koordinimit të aktiviteteve në fushën e zhvillimit rajonal, me qëllim të avancimit të zhvillimit socio – ekonomik rajonal të balancuar.

Në këtë kuadër, përfaqësuesit e MZHR-së, prezantuan edhe bashkëpunimet që MZHR ka me donatorë dhe aktiviteteve që do të realizohen në periudhën në vazhdim, për përkrahjen e bizneseve mikro dhe të vogla.

Përfaqësuesit e komunave: Mitrovicës dhe Skënderajt, vlerësuan lartë vizitën dhe përkrahjen që MZHR po e jep për komunat në vazhdimësi, qoftë përmes investimeve kapitale apo subvencioneve dhe granteve për biznese.

Palët në takime, evidentuan një mori e temave dhe aktiviteteve konkrete të cilat mund të realizohen përmes bashkëpunimit të komunave të rajonit zhvillimor Veri, qoftë në aspekt të zhvillimit të turizmit, kulturës dhe avancimit të infrastrukturës publike, e të cilat hyjnë në funksion të avancimit të zhvillimit rajonal të balancuar.