Nga data 11-14 shtator 2024, Drejtoresha e Departamentit për Integrime Evropiane dhe Koordinim të Politikave në Ministrinë e Zhvillimit Rajonal (MZHR), znj. Refike Sülçevsi, së bashku me përfaqësues të projektit MARDI, Komunës së Fushë Kosovës dhe Caritasit Zvicerran, realizuan një vizitë zyrtare në komunat Keçiören dhe Mamak në Ankara, Turqi.

Në datën 11 shtator, delegacioni u prit nga Kryetari i Komunës së Mamakut, z. Veli Gündüz Şahin, ku u diskutuan mundësitë për bashkëpunim ndërmjet komunës së Mamakut dhe Fushë Kosovës. Palët u fokusuan në shkëmbimin e përvojave dhe potencialin për projekte të përbashkëta në të ardhmen.

Më 12 shtator, vizita vazhdoi në Komunën Keçiören, ku delegacioni u prit nga Nënkryetari i komunës, z. Atila Zorlu. Znj. Sülçevsi prezantoi programet MARDI dhe YENI, duke theksuar qëllimin e këtyre programeve për të krijuar bashkëpunim ndërkomunal në fushat ekonomike, kulturore dhe sociale. Nënkryetari i Komunës së Fushë Kosovës, z. Besnik Osmani, prezantoi arritjet dhe sfidat e komunës së tij dhe shprehu interes për të zgjeruar bashkëpunimin me Komunën Keçiören.

Vizita përfshiu edhe aktivitete të tjera kulturore dhe institucionale, si vizita në Muzeun e Ataturkut, Akuariumin dhe Parkun Zoologjik të Komunës Keçiören. Gjatë takimeve u theksua rëndësia e organizimit të mëtejshëm të takimeve në Kosovë dhe shkëmbimit të ideve për binjakëzim dhe projekte të përbashkëta.

Kjo vizitë zyrtare është një hap i rëndësishëm drejt thellimit të bashkëpunimit ndërmjet komunave të Kosovës dhe Turqisë, duke përfituar nga përvojat dhe mundësitë e zhvillimit të ndërsjellë.