Në kuadër të angazhimeve për forcimin e partneritetit institucional dhe avancimin e politikave për zhvillim të qëndrueshëm rajonal, znj. Kreshnike Arifi, Udhëheqëse e Divizionit për Koordinim Rajonal në Ministrinë e Zhvillimit Rajonal, realizoi një vizitë pune në Agjencinë për Zhvillim Rajonal Qendër (AZHR Qendër), ku u prit nga znj. Mimoza Tafashiku, Drejtoresh në këtë agjenci.

Gjatë takimit u shqyrtuan zhvillimet e fundit në nivel rajonal si dhe iniciativat strategjike të ndërmarra nga AZHR Qendër, duke përfshirë hapat konkret drejt transformimit të agjencive aktuale në Qendra të Zhvillimit Rajonal (QZHR), sipas kornizës së re institucionale.

Një pjesë e rëndësishme e diskutimit iu kushtua promovimit të thirrjes publike të hapur nga Ministria e Zhvillimit Rajonal, me theks të veçantë në thirrjen për Nën Masën 2.1, e cila synon fuqizimin ekonomik të ndërmarrjeve mikro dhe të vogla në zonat më pak të zhvilluara.

Në takim u diskutuan gjithashtu mundësitë për intensifikimin e bashkëpunimit ndërinstitucional dhe përfshirjen aktive të akterëve lokal në zbatimin e projekteve që ndikojnë pozitivisht në zhvillimin e qëndrueshëm të rajonit Qendër.