Ministria e Zhvillimit Rajonal më datë 10 shtator 2025, organizoi ceremoninë e nënshkrimit të kontratave me 78 përfituesit e Skemës së Granteve në kuadër të Programit për Zhvillim Rajonal të Balancuar – PZHRB 2025.

Ceremonia u hap nga Zëvendësministri në detyrë i Zhvillimit Rajonal z. Elldin Uglari, i cili në fjalën e tij përshëndetëse theksoi: “Është kënaqësi e veçantë që në emër të Ministrisë së Zhvillimit Rajonal të nënshkruajmë kontratat me ju – përfituesit e Programit për Zhvillim Rajonal të Balancuar 2025. Kjo skemë grantesh për vitin 2025 do të mbështesë gjithsej 78 përfitues, me synim krijimin e vendeve të reja të punës, nxitjen e zhvillimit ekonomik dhe ngritjen e kapaciteteve prodhuese në vend.”

Në fund të fjalës së tij, z. Uglari uroi përfituesit për zbatimin me sukses të projekteve të tyre, duke theksuar se investimi në sektorin e prodhimit mbetet prioritet i Qeverisë së Republikës së Kosovës si një nga fushat më të rëndësishme për zhvillimin e vendit.

Ndërsa Zv. Sekretarja e Përgjithshme e MZHR-së, znj. Refike Sülçevsi, i uroi përfituesit për punë të mbarë dhe suksese gjatë implementimit të projekteve, duke falënderuar njëkohësisht stafin e Ministrisë për angazhimin e tyre të palodhur.

“Ne presim që makineritë, pajisjet dhe projektet e mbështetura nga kjo skemë të shërbejnë si modele suksesi dhe frymëzim për të tjerët, duke kontribuar në zhvillimin ekonomik e social të vendit. Ministria do të mbetet partnere e juaja gjatë gjithë periudhës së zbatimit,” tha znj. Sülçevsi.

Pas përfundimit të fjalimeve, u realizua nënshkrimi i kontratave ndërmjet MZHR-së dhe përfituesve të Skemës së Granteve PZHRB 2025, i cili u zhvillua në grupe.