Më 22 tetor 2025, Agjencia për Zhvillim Rajonal – Perëndim, me mbështetje nga Ministria e Zhvillimit Rajonal, në Pejë organizoi punëtorinë me temën “Zbatimi i Ligjit për Zhvillim Rajonal të Balancuar dhe inicimi i hartimit të Planit Operacional Rajonal”.

Qëllimi i punëtorisë ishte informimi i përfaqësuesve të komunave të regjionit të Perëndimit me bazën ligjore dhe aktet nënligjore që lidhen me Zhvillimin Rajonal të Balancuar, si dhe theksimi i rëndësisë së kësaj baze ligjore për krijimin e planit operacional për secilën komunë veç e veç, dhe për mundësitë e bashkëpunimit në nivel regjional në përgjithësi.

Në këtë punëtori, e cila u udhëhoq nga strukturat e AZHR Perëndim, pjesëmarrësit u njoftuan edhe me organizimin e ardhshëm të AZHR-ve dhe funksionimin e tyre.
Sipas organizimit të ri, nga pesë regjione ekzistuese do të krijohen shtatë regjione, ndërsa emërtimi i tyre do të jetë: Qendra Zhvillimore Rajonale (QZR).

Gjithashtu, gjatë punëtorisë u prezantuan:

• Prioritetet zhvillimore të përcaktuara në strategjitë kombëtare dhe rajonale, në fushat e zhvillimit ekonomik dhe turizmit të qëndrueshëm;
• Prioritetet zhvillimore të identifikuara në planet zhvillimore komunale dhe strategjitë lokale, në të njëjtat fusha.

Përfaqësuesit komunalë të autorizuar kontribuan me identifikimin e prioriteteve zhvillimore të komunave të tyre, duke theksuar fushat me potencial për zhvillim të përbashkët rajonal.

Në cilësinë e monitoruesit nga Ministria e Zhvillimit Rajonal, në punëtori mori pjesë z. Shani Hamitaga, Udhëheqës i Divizionit për Nisma Rajonale në MZHR.