Nga data 17 deri më 20 qershor 2025, Ministria e Zhvillimit Rajonal mori pjesë aktive në Forumin për Parandalimin e Emigrimit të të Rinjëve nga Kosova, i organizuar në kuadër të Projektit INTEGRA, në Maqedoni.
Me moton “Rri në Kosovë, se ma mirë s’ka”, gjatë këtij forumi u prezantuan arsyet kryesore të emigrimit, grupmoshat më të prekura, si dhe destinacionet kryesore të emigrimit nga të gjitha komunat dhe institucionet pjesëmarrëse. MZHR prezantoi të dhënat e fundit mbi emigrimin në shtatë rajonet zhvillimore të Kosovës dhe rolin e saj në zbatimin e programeve për zhvillimin e infrastrukturës, mbështetjen e sektorit privat dhe përkrahjen e organizatave të shoqërisë civile, me qëllim reduktimin e pabarazive rajonale dhe zhvillimin socio-ekonomik të qëndrueshëm. Këto masa synojnë parandalimin e migrimit të brendshëm dhe emigrimit ndërkombëtar.
Forumi përfshiu panele diskutimi mes aktorëve nga niveli qendror dhe lokal, të fokusuar në harmonizimin e politikave zhvillimore për parandalimin e emigrimit të të rinjve nga Kosova.
Nga MZHR morën pjesë: znj. Shyhrete Kastrati – Drejtoreshë e Departamentit për Performancë dhe Analiza Rajonale, znj. Qefsere Bajrami – Udhëheqëse e Divizionit për Analiza Socio-Ekonomike Rajonale dhe znj. Blinda Bytyçi – Zyrtare për Zhvillim Rajonal të Balancuar. Në forum ishin të pranishëm gjithashtu përfaqësues nga 11 komuna partnere, Qendra për Aftësim Profesional, OJQ dhe institucione të tjera nga niveli qendror.
