Sot më date 19.05.2026 Ministri në detyrë i Zhvillimit Rajonal z. Rasim Demiri së bashku me Kryetarin e Komunës së Ferizajt z. Agim Aliu, përuruan finalizimin e projektit “Krijimi i infrastrukturës turistike” në fshatin Varosh të Ferizajt.
Ky projekt është realizuar me mbështetjen e Ministrisë së Zhvillimit Rajonal dhe në bashkëfinancim nga Komuna e Ferizajt me vlerë prej 359,756.35 euro.
Me këtë rast, ministri z.Demiri theksoi rëndësinë e investimeve në projekte që ndikojnë drejtpërdrejt në zhvillimin lokal dhe promovimin e potencialit turistik të rajoneve të Kosovës. Ai vlerësoi se investimet në infrastrukturën turistike kontribuojnë në përmirësimin e cilësisë së jetesës së qytetarëve dhe krijimin e mundësive të reja për zhvillim të qëndrueshëm socio-ekonomik.
Ndërkaq, Kryetari i Komunës së Ferizajt z. Agim Aliu, falënderoi Ministrinë e Zhvillimit Rajonal për bashkëpunimin dhe mbështetjen e vazhdueshme në realizimin e projekteve me interes për qytetarët e komunës së Ferizajt.
Gjatë këtij aktiviteti u theksua se projekte të tilla janë të rëndësishme për avancimin e infrastrukturës lokale, promovimin e turizmit dhe fuqizimin e zhvillimit rajonal të balancuar.
Ministri z. Rasim Demiri gjatë kësaj vizite u shoqërua nga U.D. Sekretari i Përgjithshëm i MZHR-së z. Ylber Çitaku, Shefi i Kabinetit, z. Izet Velia dhe znj. Arta Maloku-Udhëheqëse e DKP.
