Gjatë vizitës zyrtare në Mal të Zi, ministri Rasim Demiri, në ditën e parë të qëndrimit të tij më 23.04.2026, me ftesë të ministrit të Zhvillimit Rajonal, të Investimeve dhe Bashkëpunimit me OJQ-të, Ernad Suljević, zhvilloi një takim edhe me sipërmarrës të njohur kosovarë në Tivar.
Takimi u zhvillua me sipërmarrës të udhëhequr nga Mefail Osmani, me origjinë nga Lubinja e Poshtme pranë Prizrenit.
Gjatë këtij takimi, përveç informimit për numrin e të punësuarve dhe statusin e tyre, delegacioni pati mundësinë të vizitojë edhe disa objekte të reja ndërtimore që ndodhen në fazën përfundimtare të realizimit.
Nga ana e sipërmarrësve u theksua edhe një shqetësim i rëndësishëm, që prek si punonjësit e tyre, ashtu edhe të gjithë qytetarët e Kosovës që punojnë dhe jetojnë në Mal të Zi. Ky shqetësim lidhet me detyrimin për pagesën e sigurimit shëndetësor, ndërkohë që, në praktikë, shërbimet shëndetësore nuk ofrohen në mënyrë të plotë nga institucionet publike shëndetësore.
(Kjo çështje është ngritur më pas edhe në kontaktet me institucionet përkatëse në Mal të Zi, si një nga çështjet që kërkon zgjidhje.)
Nga ana e mikpritësve u organizua gjithashtu një takim i veçantë me aktivistë nga jeta shoqërore dhe fetare, ndër të cilët ishte edhe Suljo Mustafić.
Në ditën e tretë të qëndrimit në Mal të Zi, gjatë kthimit për në Kosovë, ministri Demiri së bashku me bashkëpunëtorët e tij, të shoqëruar nga z. Osmani, vizituan një nga vendet e krimit nga pranvera e vitit 1945, në fund të Luftës së Dytë Botërore – ndërtesën “Monopoli” në portin e Tivarit. Në këtë vend, një numër i madh i kosovarëve të mobilizuar, të paarmatosur, u vranë nga njësitë partizane të asaj kohe.
